काठमाडौं । नेपाली कांग्रेसले स्थानीय तहको उपनिर्वाचनको परिणाम आगामी चुनावी रणनीतिका लागि महत्वपूर्ण भएको निष्कर्ष निकालेको छ ।

पार्टी महामन्त्री एवं उपनिर्वाचन केन्द्रीय संयोजनक समितिका संयोजक विश्वप्रकाश शर्माले मंगलबार विज्ञप्ति जारी गरी जित र हार व्यहोरेका सबै स्थानको कारण र प्रवृत्तिको वस्तुगत समीक्षा आगामी चुनावी रणनीति निर्माणका लागि महत्वपूर्ण रहने निष्कर्ष निकालेको जानकारी दिएका हुन् ।

उनले भनेका छन्, ‘२०७९ मा विजय पाएको केही स्थान हामीले गुमाएका छौं भने त्यसबेला अन्य दलले जितेका केही स्थानमा विजय हासिल गरेका छौं । लोकतन्त्रमा शतप्रतिशत स्थानमा जितको अपेक्षा लोकतान्त्रिक सोच हुन्न, तर जित र हार व्यहोरेका सबै स्थानको कारण र प्रवृत्तिको वस्तुगत समीक्षा आगामी चुनावी रणनीति निर्माणका लागि महत्वपूर्ण रहने हाम्रो निष्कर्ष छ । हामी यो गर्नेछौं ।’

त्यस्तै उनले गलत र भ्रमपूर्ण सूचनाहरूको बलमा मन र मत जित्न सकिने भ्रम आम रूपमा परास्त भएको पनि उल्लेख गरेका छन् ।

विज्ञप्तिमा भनिएको छ, ‘उपनिर्वाचनमा आवेग र उत्तेजनाको राजनीति पनि मैदानमा देखियो । गलत र भ्रमपूर्ण सूचनाहरूको बलमा मन र मत जित्न सकिने भ्रम आम रूपमा परास्त भएको छ । निराशालाई मतमा बदल्न खोज्ने प्रवृत्तिसँग सजग रहँदै काममार्फत विश्वास जगाउन र सामाजिक सञ्जालमार्फतका भ्रमहरू चिर्न पार्टी पंक्तिको विशेष सतर्कता र कृयाशिलता जरुरी देखिएको छ । यो उपनिर्वाचनमा सामाजिक सञ्जाल मार्फत सकृय भुमिका निभाउने युवा पंक्तिलाई पार्टी सम्मान गर्दछ ।’

रिक्त ४४ स्थानमा भएको उपनिर्वाचनमा १९ स्थानमा नेपाली कांग्रेसका उम्मेदवार विजयी भएका छन् । समग्रमा यो ४३.१८ प्रतिशत हो ।