६ मंसिर, स्वच्छखबर, काठमाडौँ ।काठमाडौं उपत्यकाका नदी तथा खोला किनारको मापदण्ड खारेज गर्न माग गर्दै र्याली निकालिएको छ । गैरन्यायिक सडक तथा खोला मापदण्ड पीडित संघर्ष समिति तथा भूमि अधिकार संरक्षण संघर्ष समितिले बिहीबार र्याली निकालेका हुन् ।
‘जनतालाई उठिबास गर्ने गैर न्यायिक सडक तथा खोला मापदण्ड खारेज गर’ लगायत नारा लेखिएका ब्यानर र प्लेकार्ड बोकेर उनीहरुले र्याली निकालेका हुन् । ललितपुरको कुपण्डोलस्थित बागमती नदी किनारबाट शुरू भएको र्याली माइतीघर मण्डलासम्म पुग्ने छ ।
र्यालीमा अभियन्ता सुमन सायमीलगायत सहभागी छन् । २०८० पुस ३ मा सर्वोच्च अदालतले नदी क्षेत्र संरक्षणका लागि बागमती, विष्णुमतीलगायत उपत्यकाका ठूला नदी तथा खोलामा ४० मिटर जग्गा छाडेर मात्र संरचना निर्माणको अनुमति दिन आदेश दिएको थियो । यो कार्यान्वयन गर्दा सयौंको उठिबास लाग्ने भन्दै कतिपयले विरोध जनाएका छन् ।
प्रतिक्रिया दिनुहोस्: